「老先覺愛郊朋友」台語走讀小旅行

2023.10.07（六）

10/7「老先覺愛郊朋友」走讀小旅行順利結束，感謝來參加ê家長，益閣有上古錐囡仔兄佮囡仔姊，連假第一工ê好天氣來鹿港𨑨迌，了解郊行ê歷史絕對是一粒一ê選擇！

當日，繪本講師黃雅君（ 鹿港茉莉人文環境教育中心Jasmine Humanities and Cultures Environmental Education Center 執行長）先講「江奶奶的雜貨店」，引𤆬囡仔熟似kám仔店，閣再由紀筱榆講師（國發會地方創生青年工作站「著鹿計畫 主持人」）𤆬逐家行入去九曲巷，解說先人佇巷仔內流落來ê歷史。鹿港俗語講ê：九曲巷 鹿港人，上敢死，放屎換秫米（tsut-bí），庄腳人，上蓋槌，提米換大肥。這句話咧講ê就是早前傳統社會交易ê狀況，這馬佇九曲巷內閣看會著以前囥屎桶ê痕跡。

路途有行到kám仔店「全成行」，予囡仔來進行任務：買山珍海味。老先覺黃榮心（#鹿港kám郊金長益湄州天上聖母四媽會創會會長）嘛佇這个時陣現身，為逐家介紹kám仔店內底賣ê商品（乾貨、豆仔、木耳......等等），老先覺疼囡仔有名ê行為嘛佇這咧時陣出現，一直提糖仔予囡仔食，囡仔兄佮囡仔姊佇這站有影四秀仔食免驚ê。

最後一站行到「郊行博物館」，黃榮心會長親身為逐家解說郊行ê歷史，博物館內kám郊佇留下來的古早工具，閣有示範縛索仔，予逐家看一手絕招！未來阮會共這工ê走讀小旅行剪輯做一支短影片，若是有興趣ê朋友歡迎關注阮ê迷眾頁！